Tahir, Mubarak


Si Mubarak M. Tahir ay isang manunulat ng wikang Maguindanaoan at Filipino/ Tagalog mula sa Kitango, Datu Piang, Maguindanao. Isinilang siya noong ika-25 ng Disyembre 1991. Siya ay bunsong anak nina Hadji Yusof Tahir Danganan at Hadja Khadiguia Maliga na pawing tubong Maguindanao.

Nakapagtapos ng kolehiyo sa Batsilyer ng Sining sa Filipino sa Pamantasang Bayan ng Mondanao (Mindanao State University), Lungsod ng Marawi bilang Cum Laude noong April 9, 2014. Naging kontribyutor siya ng Mindanao Varsitarian (Ang Opisyal na Publikasyon ng mga Mag-aaral ng MSU Marawi). Sa parehong taon din nakapagsulat siya ng “Su Migkamala a Inged” o “the Dried Land” na naging bahagi ng 24 naratibo ng 24 apat na manunulat mula sa Pilipinas na naisulat sa iba’t ibang wika at may salin sa wikang Ingles. Ang mga piksyon at tula ay nakapaloob sa AGAM na inilimbag ng Institue Climate and Sustainable Cities. Ang AGAM ay nagkamit ng gawad gaya ng National Book Awards 2015 at Gintong Aklat Awards 2016 bilang Best English Anthology Book.

Mula taong 2014 hanggang 2016 ay nakapagturo siya bilang instraktor ng Filipino sa Mindanao State University, Lungsod ng Heneral Santos. Lumipat siya sa Philippine Science High School Southern Mindanao Campus bilang Special Science Teacher sa Filipino. Noong 2017 ay pumasa siya sa Professional Licensure Examination for Teachers. Kasalukuyan nnaman siyang kumukuha ng Masters of Arts in Education major in Teaching in Filipino sa University of Mindanao, Lungsod ng Davao.

Noong 2017 ay isa siya sa nagkamit ng parangal sa 67th Carlos Memorial Palanca Awards for Literature sa kategorya ng sanaysay sa Filipino bilang ikatlong gantimpala para sa akdang “Aden Bon Besen Uyag-uyag (May Buhay Pa Pala)”- isang personal na sanaysay tungkol sa bayan ng Maguindanao sa panahon ng digmaan.
Naging malaking inspirasyon sa kanya ang kanyang pagkapanalo sa Gawad Palanca at bilang kauna-unahang Maguindnaoan na nanalo, kaya nagpatuloy siya sa pagsusulat ng mga sanaysay, maikling kuwento at tula. Ang kanyang mga akda ay ipinasa niya sa iba’t ibang worksyap sa pagsulat gaya ng Davao Writers Workshop 2017 at 25th Iligan National Writers Workshop na parehong natanggap ang kanyang mga katha at napili bilang fellow.

Ang kanyang mga akda ay lagi’t laging nakakabit ang kanyang identidad bilang Maguindanaoan na naglalahad at naglalarawan ng kultura nito kaya mula sa mga pamagat nito ay kakikitaan na ng tatak dahil sa wikang ginamit.

Ang kanyang mga akdang piksyon, tula, at sanaysay ay nailathala sa ALPAS Journal, Cotabato Literary Journal, Dagmay (Davao Writers Journal), at Sun Star Davao gaya ng Maguindanao: Ang Aking Pagkakakilanlan, May Buhay Pa Pala, Padiyan: Lagakan ng Kuwento ng Maguindanao, Manika, at Ang mga Kaluluwa sa Bayan.

Para sa kanya, isang instrumento at daluyan ng pagpapakilala sa kanyang kinagisnang kultura. Batid niyang malaki at mahalaga ang kanyang tungkulin bilang isang manunulat na Maguindanaoan. Maraming manunulat na mula sa pangkat ng mga Moro ngunit iilan lamang ang kilala dahil sa kawalan ng akses sa iba’t ibang paglalathala at pagpapalimbag kaya nais niyang ipakilala ang kultura ng Maguindanaoan na hatid ng bagong sibol na manunulat.

Nagsusulat at patuloy siyang magsusulat para sa mga Moro, para sa Maguindanaoan, para sa mga Pilipinong handing makinig at bukas ang isipan para sa mga Maguindanaoan, hindi dahil kinakailangan nilang makisimpatya sa sitwasyon naming, ngunit bilang mga Pilipino tungkulin natin na alamin upang malinang ang kultural at sosyal na kamalayan. Sa pamamagitan nito, magkaroon ng paunang hakbang sa pagbubura ng negatibong mga pananaw o persepsyon sa pangkat ng mga Moro, kawalan ng pagkakapantay-pantay at diskriminasyon.

PUBLISHED WORKS

1. Su Mga Ngiyawa Kanu Inged (Ang Mga Kaluluwa sa Bayan)
Isang tula na naisulat sa wikang Maguindanaoan at isinalin sa Filipino batay sa anadiplosis na pamaraan. Nailathala ito sa Dagmay noong Marso 18, 2018 at sa Cotabato Lierary Journal para sa April Issue.

2. Manika
Isang piksyon na kasama sa ALPAS Journal para sa year-end issue noong 2017

3. Padiyan: Lagakan ng Kuwento ng Maguindanao
Isang personal na sanaysay na kasama sa ALPAS Journal para sa year-end issue noong 2017

4. Aden Bon Besen Uyag-uyag (May Buhay Pa Pala)
Personal na sanaysay na nailathala sa Dagmay noong Disyembre 17, 2017 at sa Cotabato Lierary Journal noong Disyembre 14, 2017

5. Ang Aking Pagkakakilanlan
Isang personal na sanaysay na nailathala sa Dagmay noong July 5, 2017

Attachments


Leave a Reply

Your email address will not be published. Required fields are marked *