CALL FOR SUBMISSIONS

“Plus/ +, At Iba Plus, Maramihan: Fiction and Personal Essays on Sexual Orientations and Gender Identities” ang working title na paukol sa pagiging marami, marami pero may pagkakakilanlan sa kaibahan, mga bagong kolektibo at sosyalidad, ng pagiging inklusibo at may distinksyon. Ito ang planong ilimbag na bagong antolohiya ng mga katha hinggil sa mga bagong pag-ako sa mga mas mararaming orientasyong sexual at mga pangkasariang identidad. Lesbians, gays, bisexuals, trans, queers, asexuals, intersexes, and everything in between! Ang mga editor ng antolohiya ay sina Rolando B. Tolentino at Chuckberry Pascual.

Halaman. Stone butch. Lipstick. Mostly straight. Mahilig sa afam, bear, twinks, hipon, lollipop, daddy, cougar. Side. Questioning. Ilan lamang ito sa samu’t saring sexualidad at identidad na sumambulat sa kontemporaryo at popular na kamalayan nitong huling dekada. Tapos na ang panahon ng pagkakaroon lamang ng dalawang kasarian, ng “third sex,” o apat na girl, boy, bakla, tomboy. Nariyan na sa popular na kultura sina Jake Zyrus, isang transman, at si Bebe Gandanghari, isang transwoman. Araw-araw napapanood sa telebisyon si Vice Ganda, isang trans- at baklang komedyante na may karelasyong lalaki na macho ang hitsura. Mayroon nang mga pelikulang nagtatampok sa mga tauhan at sexualidad na dati-rati ay hindi maiisip na ipapalabas sa sinehan: nariyan ang batang lesbiana sa Huling Cha-cha ni Anita, ang transwoman sa Die Beautiful, ang mga matandang bakla (o bisexual) na bida sa Rainbow’s Sunset. Sa panitikan, maaaring ituring na halimbawa ang matapang na paglalahad ni Paulo Pacolor Garcia sa danas ng isang HIV-positive na tao sa “Affirmations, or an HIV Rhapsody,” ang mga confessional na dagli ni Jack Alvarez sa Ang Autobiografia ng Ibang Lady Gaga, at ang pagsasalaysay ni Bernadette Villanueva Neri tungkol sa relasyon ng dalawang matandang babae sa maikling kuwentong “Pamamanhikan.”

Ang larawan ay mula sa https://remit.com.au/the-legend-of-the-sarimanok/

Layon ng antolohiya na matipon ang mga katha (kwento at sanaysay sa Filipino at Ingles, o sa iba pang wika sa bansa na may salin sa Filipino o Ingles) na nagtatampok sa karanasan ng mga bago kundi man pag-ako sa mas angkop na mga sexualidad at identidad, iyong sinisimbolo ng + sa LGBTQIA+. Isang paraan ito upang bigyang representasyon ang mga bagong karanasan sa panitikan, o mga karanasang malamang ay dati nang dinaranas ng mga indibidwal, ngunit hindi maisulat-sulat dahil lubhang lumilihis sa kung ano ang itinuturing na “katanggap-tanggap.” Layon rin ng antolohiya na tugunan ang nagbabagong diskurso ukol sa sexualidad at identidad na bunsod ng paglaganap ng social media at new media, kung kailan tila nagiging bagong normal na ang pagkakaroon ng mga “alter accounts,” o ayon nga sa isang meme, kompartmentalisasyon ng sarili, batay sa gamit na platform: kagalang-galang sa Facebook o LinkedIn, kaakit-akit sa Tinder, pa-artsy at pa-cute sa Instagram, makalat o woke, o sabayang makalat at woke sa Twitter. At hindi lamang para sa simpleng pangingiliti sa imahinasyon o panggugulat sa mambabasa; sapagkat ang mga bagong sexualidad at identidad ay integral na bahagi ng balon ng ating paghaharaya sa kasalukuyang lipunan. Sino at ano ba ang pinagmumulan, ang gumigising ng ating mga paghahangad? Sino at ano ang tumatanggap at sumasalo sa ating mga pagnanasa? Ano-ano ang mga posibleng daluyan ng ating mga paglulunggati? Paano ba iginuguhit ng lokasyon ang mapa ng sexualidad, ang mga hangganan ng ating mga identidad? Ano ang paglulunggati ng indibidwal mula sa ating mga rehiyon? Anong uri ng sexualidad kaya ang nahuhubog ng Filipinong nasa ibang bansa? Paano ba magsulat tungkol sa sexualidad at identidad ngayong panahon ng globalisasyon? Bagong parte ng uniberso ng ating mga pagkatao ang maaaring masipat sa mabubuong antolohiya.

Ang larawan ay mula sa https://filipiknow.net/the-ancient-mindanao-deities-of-philippine-mythology/

Ang mga ipapasang akda ay maaaring maging katha/maikling kuwento o personal na sanaysay/creative non-fiction, maaaring nakasulat sa Filipino o Ingles. Maaari ring magpasa ng katha o sanaysay na nakasulat sa wikang rehiyunal, basta mayroong kasamang salin sa Filipino o Ingles. At dulot na rin ng pagiging sensitibo ng paksa, maaaring gumamit ng pseudonym ang mga magpapasa ng kanilang mga akda. Iginagalang ng mga editor ang karapatang maging pribado ng mga nais mag-ambag sa antolohiya.

Nasa ibaba ang listahan ng mga sexualidad at identidad na maaaring itampok sa mga akda. Batid ng mga editor na maaaring masyadong banyaga ang mga nasa listahan, kaya nililinaw na hindi lamang nalilimita sa mga ito ang mga paksa, at bukas ang antolohiya sa anumang identidad o sexualidad na maaaring magmula sa alinmang lugar o rehiyon sa bansa.

  • Asexual / Halaman
  • Bears
  • Bi-curious
  • Bisexual / Silahis
  • Chubby chaser
  • Cougar
  • Daddy
  • Genderqueer / non-binary
  • Heteroflexible / mostly straight man or woman
  • HIV-positive / poz / pozzie / pusit
  • Hipon
  • Interracial
  • Lipstick lesbian / femme
  • Lollipop
  • Pansexual
  • Polyamory
  • Questioning
  • Side
  • Soft butch
  • Stone butch lesbian
  • Stone femme
  • Transmen
  • Transwomen
  • Twinks
  • At iba pa, kaya i-join ang marami pang iba pa, marami pang kaibahan.

Maaaring i-email ang mga akda at anumang katanungan o paglilinaw sa maramihananthology@gmail.com. Magsama ng tatlong pangungusap na bionote, at sertifikasyon na ito ay orihinal sa awtor at hindi pa nalalathala. Ang deadline ng pagpapasa ay 31 Mayo 2020.

Ang larawan ng mga anito ay mula sa https://upload.wikimedia.org/wikipedia/commons/f/fc/Anitos_of_Northern_tribes_%28c._1900%2C_Philippines%29.jpg.

Written by Chuckberry J. Pascual