Inaanyayahan ang mga manunulat ng kuwentong pambata sa mga wika ng Visayas na sumali sa kontes na Aliwanag. Pinapangasiwaan ito ng Aklat Alamid katuwang ang publisher na Kasingkasing Press, ang bookshop na Ikaduhang Andana, ang samahang Katig Writers Network, Inc., at ang organisasyong The Philippine Board on Books for Young People.

Katuwang ang Kasingkasing Press, unang beses na isinagawa ang Aliwanag mula Hulyo 2019 hanggang Hulyo 2020 at nakatuon sa tatlong wika sa Kanlurang Visayas. Kasama sa mga akdang pinarangalan ay isinulat nina Alex C. Delos Santos, Alrom Christian P. Ricafuente, Anna Marie C. Iguban, Anna Teresa C. Iguban, Jame A. Valenia, Jay Gallera Malaga, Julbert R. Paloma, Nicole-Ann T. Lucas, Orland Agustin Solis, Shur C. Mangilaya, at Willer Jun Manares. Nagsilbi namang mga hurado sina Aurea Paz, Early Sol A. Gadong, Gil S. Montinola, John E. Barrios, Melchor F. Cichon, Michael Caesar Tubal, at Noel G. de Leon.

Ngayong taon, binubuksan ang Aliwanag sa sinumang nakapagsusulat sa alinmang katutubong wika ng Visayas, gaya ng Hiligaynon, Aklanon, Kinaray-a, Cebuano, Bantayanon, Waray, Inabaknon, at iba pang wika at mga baryasyon ng mga ito sa Kanluran, Gitna, at Silangang Visayas. Ibig sabihin, maaaring sumali ang mga manunulat na hindi mula sa Visayas ngunit nakapagsusulat sa alinmang katutubong wika nito.

Ipapasa lamang ang isang maikling kuwentong isinulat para sa mga batang 6-9 taong gulang at may kabuuang haba na hindi lagpas ng 1,000 salita. Isusulat ito sa alinmang katutubong wika ng Kanluran, Gitna, at Silangang Visayas, at sasamahan ng salin sa Filipino o Ingles. Kailangang orihinal na likha ng may-akda ang kuwento at hindi lamang muling pagsasalaysay o paghahalaw ng isang kuwentong bayan o ng anumang naunang akda. Maaari namang magpadala ng higit sa iisang kuwento ang sinumang sasali.

Ipapadala ang kuwento bilang kalakip ng isang email sa [email protected] Ilalagay sa subject ng email ang ALIWANAG 2021 at sa loob nito ang buong pangalan ng sasali, wika ng kuwento, bayan at/o probinsiya, at maikling pagpapakilala ng sarili. Sa 15 Hunyo 2021 ang huling araw ng pagpasa.

Pipili ang mga hurado ng mananalong akda sa bawat wika. Pangunahing batayan sa pagpili ang potensiyal ng kuwento na mailathala bilang isang picture book. Maaaring marami o walang manalo sa isang wika at maaaring magtalaga ng mga karangalang banggit batay sa pagtataya ng mga hurado. Tatanggapin ng bawat mananalo sa bawat wika ang ₱10,000.00, mga libro, at sertipiko. Tatanggapin naman ng bawat karangalang banggit ang ₱5,000.00, mga libro, at sertipiko. Titingnan din ng Aklat Alamid ang mga paparangalang akda para sa konsiderasyong mailathala.

Iaanunsiyo ang mga mananalo sa pagdiriwang ng National Children’s Book Day sa 20 Hulyo 2021.

Para sa mga katanungan, magpadala lang ng mensahe sa Facebook page ng Aklat Alamid o sa email na [email protected]