Mga nagwagi sa Gawad Kataga sa Pagsulat ng Dagli

Isang dumadagundong na pagbati sa mga nagwagi sa kauna-unahang Gawad Kataga sa Pagsulat ng Dagli!

Napoleon Arcilla
Unang gantimpala

Christian Paul Camposano (Luci Luz)
Ikalawang gantimpala

Danica B. Matias
Ikatlong Gantimpala

Ang Lupon ng Inampalan ay binubuo nina Jack Alvarez (Stefani J Alvarez) ng Kataga-Online, Eros Atalia, at Isaac Ali Tapar, kasalukuyang Pangulo ng Kataga. Sina Jan Henry M. Choa Jr. at Abby Pariente ang nagsilbing pangkalahatang tagapangasiwa ng Gawad.

Gaganapin sa Sabado, Setyembre 29, ang paggagawad ng tropeo, premyong salapi, at sertipiko sa mga nagwagi. Maraming salamat sa 75 kataong nagpadala ng lahok! Hanggang sa susunod na Gawad! #KATAGAIsangDekada

Kataga @10: Isang Dekada ng Masining at Makabuluhang Paglikha

Inaanyayahan ang lahat sa pagdiriwang ng ikasampung anibersaryo ng Kataga, Samahan ng mga Manunulat sa Pilipinas, Inc. sa darating na Setyembre 29, 2018 sa University Hotel, UP Diliman mula 5:00 N.H. hanggang 9:00 N.G.

Itinatag noong 20018, ang Kataga ay binubuo ng kapwa premyado at umuusbong na mga manunulat na nagsusulong ng makabuluhang panitikan at sining. Mayroon itong pitong pinagtibay na sangay – Kataga-Quezon City, Kataga-Manila, Kataga-Manila-South, Kataga-Lucena (Panitikan), Kataga-Lucena (Tanghal), Kataga-Zambales, at Kataga-Online.

Kabilang sa pagdiriwang ang paggawad sa mga nagsipagwagi sa kauna-unahang Gawad Kataga sa Pagsulat ng Dagli, pagpapakilala sa mga unang Halal na Kasapi ng Kataga, at paglulunsad-aklat ni Dr. Reuel Molina Aguila, at ng samahan.

Bukas ang imbitasyon sa lahat ng interesado sa sining at panitikan!

#KATAGAIsangDekada

Paanyaya mula sa KATAGA-QC | Daglian 2018

Inihahandog ng KATAGA-Quezon City ang DAGLIAN 2018: Palihan sa pagsulat ng Dagli.
Inaanyayahan ang mga manunulat edad 17 pataas na nagnanais magbahagi ng mga kuwentong nasa anyong DAGLI. Sali sa isang araw na pag-aaral at palihan sa darating na Setyembre 23, linggo (8 n.u.-5 n.h.)

Makakasama sa DAGLIAN 2018 ang mga premyadong manunulat at guro ng panitikan na sina G. Erick Dasig Aguilar (Palanca-award winner, makata, mandudula at guro sa UP Visayas), Bb. Christine Lim Magpile (copy editor sa UP Press, mananaysay, kuwentista, at manunulat ng mga textbook), at G. John Toledo (mananaysay at guro sa UP Los Banos) upang ibahagi ang kanilang karanasan sa panulat, at tumulong sa pagpapahusay ng mga manunulat sa sining ng DAGLI.

Paano sumali?

1. Maghanda ng isa hanggang dalawang DAGLI na hindi lalampas sa dalawang pahina. Malaya ang paksa at temang lalamanin ng DAGLI. Lagyan ng pamagat ang ipapasang mga akda.

2. Gumamit ng 12 points, Arial, doubled-spaced, 8.5 x 11 ang sukat ng pahina at may 1” margin sa lahat ng gilid. I-save ito sa .doc o .docx na file gamit.

3. Lakipan ng pangalan, edad, tirahan, email address at contact information (cellphone number) ang inyong ipapasang akda.

4. I-email ito sa daglian2018@gmail.com

Mayroong P500.00 na registration fee ang palihan para sa pagkain, mga materyales ng lektura, sertipiko at literary folio (na ipapamahagi o ipapadala sa Setyembre 29, anibersaryo ng KATAGA).
Para sa karagdagang impormasyon, mag-email lamang sa daglian2018@gmail.com o magtungo sa facebook.com/kataga.lit/

Kataga-Quezon City, tumatanggap na muli ng mga aplikante

BUKAS NA PAANYAYA PARA MAGING KANDIDATONG KASAPI SA KATAGA-QUEZON CITY

Ang Kataga-Quezon City, isa sa mga sangay ng Kataga, Samahan ng mga Manunulat sa Pilipinas, Inc., ay tumatanggap na ng aplikasyon para sa mga magiging Kandidatong Kasapi. Ang mga Kandidatong Kasapi ay sasanayin sa sining ng malikhaing pagsulat, kasaysayan ng panitikan at lipunan, at pananaw sa pagsusulat. Ang pagsasanay ay magsisimula sa Nobyembre 18, 2017 at magtatapos sa gawing Marso 2018.

Bukas ang aplikasyon–at higit ang paghihikayat–sa mga interesadong manunulat mula 18 taong gulang pataas na taga-Quezon City o nagtatrabaho sa nasabing lungsod, propesyunal at/o nasa propesyon ng pagtuturo.

Maaaring magpasa ng alinman sa mga sumusunod: limang (5) tula o tulang pambata; tatlo hanggang limang (3-5) dagli, dalawang (2) sanaysay; dalawang (2) maikling kuwento o kuwentong pambata; isang (1) yugtong dula, o isang (1) iskrip pampelikula. Sampu hanggang labinlimang (10-15) pahina lamang sa bawat kuwento o sanaysay.

Lakipan ang mga ipapasang akda ng isang (1) pahinang sanaysay tungkol sa sariling poetika (bakit nagsusulat, ano ang isinusulat, at para kanino nagsusulat) at maikling biodata na may contact information at retrato (1”x1” o 2”x2”).

Ang mga manuskrito ay i-set sa format na Arial o Times New Roman font type, 12 font size, double-spaced, may line numbers at page numbers, sa 8.5 x11 na dokumento.

Ipadala ang aplikasyon at anumang katanungan sa kataga.siyudadquezon@gmail.com. Ang deadline ng aplikasyon ay Nobyembre 4, 2017 (Sabado).  

Ang makakapasa o makakatapos ng pag-aaral ay magiging ganap na kasapi ng Kataga-Quezon City.

Paanyaya para sa Campus Tagaan

Sinimulan ang Campus Tagaan bilang programa ng Kataga-Manila kasama ang piling organisasyong pampanitikang pangkampus noong 2014. Layunin nitong mapatibay ang ugnayan ng Kataga-Manila sa iba’t ibang kampus at makapagbigay ng libreng literary clinic sa mga interesadong estudyante ng kolehiyo at/o Senior High School sa Maynila.

Ngayong 2017, muli itong magbubukas at magbibigay ng pagkakataon sa labinlimang (15) fellow. Maaaring magpasa ng alinman sa mga sumusunod: tatlong (3) tula o tulang pambata; tatlong (3) dagli, isang (1) sanaysay; isang (1) maikling kuwento o kuwentong pambata; o isang (1) yugtong dula. Tatanggap lamang ng mga akdang nakasulat sa wikang Filipino.

Ipadala ang mga aplikasyon sa kataga.manila@gmail.com. Maaaring magpasa ng aplikasyon hanggang August 20, 2017. Para sa mga katanungan, maaaring ipadala sa nasabing email o sa mga direktor ng programa na si Wynclef H. Enerio sa 0977 122 0415 at Rhea Gulin sa 0926 9920 918.

Palihang Kataga: Seminar sa Pagtuturo ng Panitikan at Malikhaing Pagsulat

Ngayong Buwan ng Sining, handog ng Kataga-Manila, isang sangay ng Kataga, ang Palihang Kataga: Seminar sa Pagtuturo ng Panitikan at Malikhaing Pagsulat na gaganapin sa bulwagan ng Cinematheque Centre Manila, Pebrero 24-25, 2017 (8:00 n.u. hanggang 5:00 n.h.).

Ang mga inaasahang kalahok sa unang araw (Pebrero 24) ay mga guro ng Panitikan, Ingles, Filipino, at/o Malikhaing Pagsulat sa antas elementarya, high school, senior high school, at kolehiyo. Mga estudyante naman sa senior high school, kolehiyo, maging mga propesyunal na wala sa propesyon ng pagtuturo ang maaaring lumahok sa ikalawang araw (Pebrero 25).

 

Sa lalahok sa Palihang Kataga:

1. Sagutan ang online registration form sa link na ito: https://docs.google.com/…/1FAIpQLSfY-kxoIjocTtbKg_…/viewform

2. Maaaring lumahok ang mga guro sa ikalawang araw, ngunit kailangang bayaran ang panibagong registration fee.

3. Mayroong registration fee na Php 400.00 para sa handouts, kits, ID, at sertipiko ng pagdalo. Hindi kasama ang pagkain at meryenda sa halagang ito.

4. Ang early bird promo na Php 350 ay hanggang Pebrero 17 lamang. Siguraduhing naipadala ang scanned deposit slip ng registration fee sa kataga.manila@gmail.com sa loob ng 48 oras matapos makapag-register online.

5. Tatanggap lamang 100 participants bawat araw para sa Palihang Kataga. Hinihiling ang kumpirmasyon ng mga lalahok upang matiyak ang upuan sa loob ng bulwagan ng Cinematheque Centre Manila. Maaaring magwalk-in ngunit hindi mabibigyang prayoridad ang mga ito.

6. Ang Cinematheque Centre Manila ay matatagpuan sa 855 T.M. Kalaw St., Ermita. Landmark ang U.N. Avenue Station ng LRT-1. https://web.facebook.com/CinemathequeMNL/?fref=ts

7. Ipadala ang inyong registration fee sa account na ito:

Bank of the Philippine Islands (BPI)
Account Name: ABEGAIL ELVIRA PARIENTE
Account Number: 4989 1141 96

8. Ipadala ang inyong mga katanungan sa kataga.manila@gmail.com o sa Facebook page na ito.

9. Sa mga gurong humihiling ng liham-paanyaya para sa kanilang eskwelahan, mangyaring i-email sa kataga.manila@gmail.com ang pangalan ng eskwelahan, address, at kinauukulang tatanggap nito.

Kataga, maglulunsad ng ikalawang antolohiya

Inaanyayahan ng Kataga, Samahan ng mga Manunulat sa Pilipinas, ang lahat na dumalo sa lunsad-aklat ng “Kataga II: Antolohiya ng Malikhaing Akda”. Gaganapin ang paglulunsad sa Oktubre 15, 2016, Sabado, ika-apat ng hapon sa College of Fine Arts Auditorium, University of the Philippines – Diliman, Lunsod Quezon. 

Ang Kataga II ay binubuo ng 70 mga tula, maikling kwento, dagli, sanaysay at dula mula sa mga kasapi ng Kataga sa iba’t ibang sangay (Online, Quezon City, Manila, Manila – South, Lucena – Panitik, Lucena – Tanghal at Zambales).

Sina Dr. Reuel Molina-Aguila, Mark Angeles at Fedinand Pesigan-Jarin ang mga editor ng pinakabagong antolohiya mula sa Kataga.

Para sa mga katanungan tungkol sa lunsad-aklat o detalye ng pag-order ng libro, i-like o magpadala ng mensahe sa https://www.facebook.com/kataga.lit/

Dinsulan: Usapang Pampanitikan sa Enero 21-23 na

Gaganapin ang Dinsulan: Usapang Pampanitikan sa ika-21 hanggang ika-23 ng Enero 2016 sa AEC Little Theater, Manuel S. Enverga University Foundation, Lucena City, Quezon. Magsisimula ito nang 9 n.u. hanggang 4 n.h. Ang pagtitipong ito ay proyekto ng Kataga-Lucena (Panitik at Tanghal) sa pakikipagtulungan ng Mass Communication Society ng nasabing pamantasan. Dahil napapansing may lumalawak na interes sa pagsusulat at pag-aaral ng panitikan ang marami sa bayan ng Lucena at sa karatig nitong mga bayan, isang mainam na pagtugon sa ganitong hamon sa kasapian ang pagsasagawa ng isang forum para sa mga nag-aaral, nagtratrabaho, o sa sinumang nais makibahagi sa ganitong uri ng talakayan. Layon ng proyektong itong lalo pang linangin ang sining at panitikan ng Quezon. Kaya’t tatangkain ng Kataga – Lucena (Panitik at Tanghal) ang magpasinaya ng usapang pampanitikan nang may pagtalakay sa iba’t ibang genre ng panitikan kaugnay ng lipunan. Isa rin itong hakbang para unti-unting makapagpakilala pa ang samahan sa larang ng pagsusulat at patuturo ng panitikan.

Kabilang sa mga tagapagsalita sina Ferdinand Pisigan Jarin, Mark Angeles, Alvin Capili Ursua, Marco Antonio Rodas, at Reuel Molina Aguila.

Registration Fee: P300 Para sa iba pang detalye, maaaring kontakin sina Yvonne Charisse Gamis (0923-1987-017) at Keanu Rairata (0923-1915-969)

Ang Kataga – Lucena ay sangay na binubuo ng dalawang samahan. Sa panig ng Kataga – Lucena (Panitik) o KaLuPa, lumilikha sila ng mga makabuluhang akda mula sa katotohanan at karanasan ng lipunan bilang kanilang ambag sa pagsulong ng lipunang ito; samantalang pinaninindigan ng Kataga – Lucena (Tanghal) o KaLuTang ang pagtatanghal ng mga akda bilang bahagi ng pagiging manggagawang pangkultura. Patuloy ang pagpatatag ng iba pang sangay ng nasabing samahan: Kataga-Manila, Kataga-QC, at Kataga-Online.

Kataga-Lucena tumatanggap ng aplikante sa malikhaing pagsulat

Malugod na tumatanggap ang KaLuPa ng mga aplikanteng nais sumailalim sa pag-aaral ng panitikan at palihan ng pagsulat. Bukas ang samahan para sa aplikasyon ng mga mag-aaral o nagtratrabaho – residente ng lungsod ng Lucena o kalapit na bayan sa lalawigan ng Quezon.

Ipadala ang alinman sa mga sumusunod: Tula (5), Tulang Pambata (5), Maikling Kuwento (2), Maikling Kuwentong Pambata (2), Dagli (2), Malikhaing Sanaysay (2), o Dula (1).
 

Maglakip ng mailing tala sa sarili, retratong may kulay, at contact number. Ipadala ang aplikasyon sa tagaanglucena2015@gmail.com.
 
Ang Kataga – Lucena ay sangay na binubuo ng dalawang samahan. Sa panig ng Kataga – Lucena (Panitik) o KaLuPa, lumilikha sila ng mga makabuluhang akda mula sa katotohanan at karanasan ng lipunan bilang kanilang ambag sa pagsulong ng lipunang ito; samantalang pinaninindigan ng Kataga – Lucena (Tanghal) o KaLuTang ang pagtatanghal ng mga akda bilang bahagi ng pagiging manggagawang pangkultura. Patuloy ang pagpatatag ng iba pang sangay ng nasabing samahan: Kataga-Manila, Kataga-QC, at Kataga-Online.
 
 
 

Kataga-QC tumatanggap ng aplikante

Tumatanggap na ng aplikante ang Kataga-QC.

– Edad 18 pataas – Residente,

-Nag-aaral o Nagtatrabaho sa Q.C.

Ipadala ang maikling bio, poetika at ilang akda: 1 (kung maikling kuwento, dula o sanaysay); 5 (kung tula o dagli), sa katagakyusi@gmail.com

Ang Kataga ay samahan ng mga manunulat na nagsusulong at nagpapalaganap ng masining at makabuluhang panitikan mula sa karanasan ng lipunan bilang ambag sa pagbabago nito. May pinatatatag itong limang sangay: Kataga-Manila, Kataga-QC, Kataga-Lucena Panitikan, Kataga-Lucena Pagtatanghal, Kataga-Online.