Ginawadan nin plake nin pagmidbid kan Sumaro Bikolnon Inc. an Bikolnong parasurat na si Clemente Bolocon Alejandria (1895 – 1981) sa Ika-6 na edisyon kan Padurunongan na ginibo kan Agosto 20, 2015 sa banwaan nin Canaman, Camarines Sur.

Si Alejandria sarong kompositor nin kanta, poeta asin mahigos na paraambag sa Calendariong Bicol, Sanghiran nin Bikol, Bicolandia, Bicolnon asin iba pang mga babasahon pangkultura poon kan dekada 1920 sagkod sa mga huring taon kan saiyang buhay. 

Kan 1926, nagunò niya an ikaduwang premyo sa sarong patiribayan sa pag-Bikol kan rawitdawit na Mi Ultimo Adios ni Jose Rizal. Mantâ, an saiyang panurat na tituladong “Paniki” iyo an guminana sa sarong patiribayan sa Sanghiran nin Bikol sa mga halipot na usipon sosog pa man sa websityo kan Bikol Wikipedia.

Iginawad ni Hon. DC Nathan Sergio, sarô sa mga kagtugdas kan Sumaro Bikolnon, an onra sa kapag-arakian ni Alejandria na ipigkokonsiderar na dyamante kan banwaan sa lantad nin literaturang Bikolnon. Nagin bisitang tagapagtaram sa okasyon si Kristian Sendon Cordero, sarong premyadong parasurat sagkod direktor sa pelikula.

Bàgo an paggawad, nagpatiribayan an mga eskwela gikan sa manlainlain na pampubliko asin pribadong elementarya sa Canaman sa pagsimbag sa Bikol quiz, tirigsikan asin sa Dama nin Tataramon na inspirasyon kan kawat na Scrabble sa tataramon na Bikol.

Nagunò ni Mary Joy S. Vidal kan Poro Elementary School an kampeonato sa Bikol Quiz. Nakua man ni Reyna B. Yocampo kan Palo Elementary School an inot na premyo sa Tigsik. Mantang, kampeon sa Dama nin Tataramon si Kane Randy P. Beringuela kan Kurtland Grade School na iyo man an idineklarang over-all champion sa siyam (9) na eskwelahan na nagpartisipar.

An taonan na patiribayan ginigibo lambang bulan nin Agosto bilang parte kan selebrasyon kan anibersaryo kan pagkamuknâ kan banwaan nin Canaman, siring man kan History Month asin Bulan nin Tataramon. (Irvin P. Sto. Tomas)